نفسي عزيزة

موضوع: نفسي عزيزة الجمعة سبتمبر 05, 2008 9:24 pm

بسم الله الرحمن الرحيم

السلام عليكم

اليوم جبتلكم قصيدة للشاعر المرحوم مصطفى عبيد حيث ولد الشاعر في مدينة هون ثم استقر في جدابيا ثم انتقل الى بنغازي واستقر فيها الى ان وافته المنية

الشاعر يقول:

نفسي عزيزة عشت واحل فيها ******** رومتها مابت علي جافيها

النفس ربيناها ******************** ع العز وماتوالف اللي يجفاها

ان قدرتها وافي ترد كفاها ************ وان جافيتها تجفاك ياجافيها

نفسي مابت ********************* تروم الجفا من صغرها لين شابت

برد الجفا لاتلومها كان زابت *********** الحاجة تبان عليك ياخافيها

نفسي شبت ********************* علي حب صافي معا عزيز تربت

قبلتو غلاها ياغوالي لبت ************* جفيتو جفت هذي طبيعة فيها

النفس عاتبناها ******************* علي جفاك ماهي ظالمة لقيناها

انت البادي ياحبيب معاها ************ تدير ف الخطا وبالقول بترضيها

خلها معا اللي يعرفو معناها ********** بلاش انت ماتقدر اليوم عليها

لاتدير السية ********************* ولاتخون نفسي بالوفا معنية

لها شروط تعرفهن دايرتهن هيا ******** تصدق معا الوافي حقوق عليها

لاتخون غلاها ******************** ولاتروم جافي بلا سبب عاداها

عاشت معا اللي يعرفو مبداها ******** لها قدر منهم كل وقت يجيها

نا فكرتي تعبر علي معناها *********** مانلومها تحكي علي ماضيها

الدنيا علي كل حال جربناها *********** عرفنا وفاها ونقصها اللي فيها

الله الله الله يا خويا سراب

هيييييه نفسى عزيزة شعر جميل جدا" و كله معانى رائعة

موفق يارب

أمنور يازعيم

كلام قوي

شعر عزيز من شخص عزيز

الله الله الله

نفسي عزيزه مره وحده

ما شاء الله والله

قصيده حليوه

ونقولك

::

ماندلل بيها نفسي عزيزة
وتهون عندي في غلا غاليها
وهي الوفية وماهي ساهلة نفسي تهون عليا
وفي شان غاليها تكون هدية
وتصعب على غيره وهو يبغيها
نفسي عزيزة

يا مصعبها
هي غالية وتهون في واجبها
ومقدرت عنك يا غلا نحجبها
أدلل معاك تكون كيف تبيها
نفسي عزيزة

يا مبعدها
على كل من حاول ومن عاندها
غالي عليها وسيتك تجحدها
وموحال مهما كان ما تحكيها
نفسي عزيزة

::

أسمحلي علي المشاركة البسيطه
هذي
للشاعر
(عبدالله منصور)

إن شاء الله تعجبك