شكراً ... لرغبتك في الانضمام إلينا .. ( تصميمي . نت )
شكراً ... لرغبتك في الانضمام إلينا .. ( تصميمي . نت )
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.



 
الرئيسيةالتسجيلأحدث الصوردخول

 

 شعر فكاهى بين شاعر ونسيبته!!!!!

اذهب الى الأسفل 
كاتب الموضوعرسالة
Dr.kemo
طالب مجتهد
طالب مجتهد
Dr.kemo


عدد الرسائل : 237
العمر : 36
مزاجي : شعر فكاهى بين شاعر ونسيبته!!!!! 02110
تاريخ التسجيل : 21/08/2008

شعر فكاهى بين شاعر ونسيبته!!!!! Empty
مُساهمةموضوع: شعر فكاهى بين شاعر ونسيبته!!!!!   شعر فكاهى بين شاعر ونسيبته!!!!! Emptyالأحد سبتمبر 07, 2008 1:42 am

الشاعر :


شن درتلك يا نسيبتي كرهتيني * فى الراس حطيتيني * بعد المحبة ليش عاديتيني
شن درتلك من سيه * وشن درتلك من عيب ردي عليا
متغيره لقيتك ومش عاديه * علقتي طواري وين ماشفتيني
انا جيت نبي انردها البنيه * وقبل مانتكلم طول سكتيني

نسيبته :
اسمع كلامي فسرا مدلولا * انا رضيت بيها نسبتك مهبولا
وحرام لشكلك بنتنا نعطولا * بنتي معاك فى حال مايرضيني
انا رميتها فى غوط خالي سبولا * ومالقيت مره حالها يزهيني

الشاعر :
عليا بالهجوم بديتي * ومسرع معايا فى الكلام حميتي
مانيش غالط كيف ماضنيتي * حكمتي عليا غلط وظلمتيني
غير ليش منها نسبتي مليتي * انتي عارفه بالحال وقبلتيني

نسيبته :
قبلت غصبن عني * الله يسامح الشايب اللى خبلني
مسكر دماغك ماتبي تفهمني * انقول برا ايسار تمشي ايميني
بنتي معاك فى حال ماطمني * وديما عليها خاطرى مشقيني

الشاعر :
بنتك معايا فى هنا وسعاده * وتضحك وتلعب دوم كيف العاده
واللى نقصها انوفره فميعاده * وشنهي نقصها وضحي وريني
والخير ديما ان شاء الله فـ زياده * مادام نخدم بـعرق جبيني

نسيبته :
بنتي معاك سنيين شن درتلها * وقداش مره اثاث غيرتلها
رابش عقاب كريهبا شريتلها * الدخان من الماطور بيعميني
انا عارفه للفقر بتوصلها * يصعب عليا حالها يبكيني

الشاعر :
بنتك معايا مااختصت حاجه * وماهيش زيك عل النكد لواجه
ولا ناقصه لاغاز لاثلاجة * وقداش من دولاب فايضه ادراجه
ونوضي انشديها كان كذبتيني

نسيبته :
عيشت الله العازا * شوف اختها اللى عايشه ممتازه
حتا الهاتف غيرت جيهازا * ولت على النقال بتحاكيني
اشبح عديلك خاشها درازا * رصيد بالدولار واسترليني
ماهوش زيك حالته محتاجه * وديما جيوبه خاليه ملاقيني

الشاعر :
تو راك معاي عفنتيها * وماعاد حتى دوتك نبيها
وكان الوليه معاى بترديها * نبي جوابك مختصر تعطيني
وكل وقت عليا حملتك ترميها * وبكل كلمة قاصده اتهينيني

نسيبته :
يالوكان توصل للقمر مشوارك * محال بنتي انردها لدارك
تنسم ادردح والتهي بصغارك * ماعاد وجهك شبحته اتوريني
مليت منها نشفتك وقحارك * بنغلط معاك انكان مش خاطيني

الشاعر :
انتي غالطه والغلط فايت حده * مادامك لبيتي نويتي هده
انتي حرام حتى فيك كلمة جده * مادام عن الصلح صديتيني
الموضوع للقانون نبي انرده * والمحكمة بيناتنا اتصافيني

نسيبته :
خوفتني ضنيتك * وماني فلانه انكان ماقديتك
تندم عليها عملتك خليتك * مادام للقانون بتمشيني
وبالك تحساب انخاف من شخصيتك * عاند معاي انكان متحديني

الشاعر :
انا عارفك منقوبه * قليلة الخير وشيرتك مذهوبه
والشر ديمه تبحثي على دروبه * ولايوم من الايام ريحتيني
من يوم ريتك عيشتي منكوبه * وياريت ماعرفتك ولا عرفتيني

نسيبته :
مسؤل عنها كلمتك هاذيه * انا الاوله بندير فيك قضيه
نقوللهم هالشخص غالط فيا * في وسط بيتى جاى متعديني
وذنبي عطيته بنت ماهي اشويه * حتا لون عيونها زرقيني
بيضه طويله كيف الالمانيه * وشوفو عليها كيف بيجازيني

الشاعر :
انا عارفك مدعي ه * وفى الخبث ليك افكار شيطانيه
وفى الكذب ديما فالحه فنيه * نبي نفضحك للناس خليتيني
قلتي عطيتك كيف الالمانيه * وانتي بلوحه معوجه حذفتيني
ورضيت بقسمة الله عليا * وناصيب بالهول علي داعيني

نسيبته :
شنهي شكلك عاجبا فى روحه * مادام بنتى وصفتها بلوحه
فى الفقر عايش ماك فى بحبوحه * ووجهك يبشر بهموم سنيني
انا قريب نشبح جبهتك مفتوحه * لوكان ماتمشيش وتباريني


الشاعر :
انا قبل مانمشي انقولك مانخبي * ياغالطه بيني وبينك ربي
مادام عكسي فى الطريق ادبي * وما دام هكي ناويه اضريني
الله يجعلك بـ طانطه تنقبي * ولا بجلطه فيك اترزيني
وحرام حتا جنازتك مانصبي * بديتي نسيبت نحس ماتهميني


شن درتلك يا نسيبتي كرهتيني * فى الراس حطيتيني * بعد المحبة ليش عاديتيني


victory
الرجوع الى أعلى الصفحة اذهب الى الأسفل
 
شعر فكاهى بين شاعر ونسيبته!!!!!
الرجوع الى أعلى الصفحة 
صفحة 1 من اصل 1
 مواضيع مماثلة
-

صلاحيات هذا المنتدى:لاتستطيع الرد على المواضيع في هذا المنتدى
 :: أدبيــات :: أشعار من هنا-
انتقل الى: