(قلت في الغــزل!) ..محبوبتي

الشعر، قلم القلب

ولكل منا الحق في التعبير عما يجول بخاطره

أيّا كان نوع تلك المشاعر

جلست ذات ليلة

أرنو إلى محبوبتي

وما هي إلا لحظات

حتى جادت قريحتي بهذه الأبيات





(بصراحة مش عارف قوانين المنتدى تسمح بشعر كيف هذا ولالا )






حَـــارَتْ بِهَا كُلّ القَوافـِــــــــي إنّها *** سِحـْــرُ العَــــوَالِمِ والكواكب والدُّنَى

مَحْبُوبَتِي عِشْقِــــي وَكُــلُّ سَرِيرَتِي *** قَدْ حَارَ شِعرِي في المَحَاسِنِ فانْحَنَى

وَيْلٌ لِقَلبـِـــي إنْ رَأيـْـــتُ تَمَايـُــــلاً *** في قَدِّهَـــا فالمــــوت مِنِّي قَدْ دَنَـــــا

إِنْ خَاطَبَـــتْ أُفُقـــًـا تَهَـاوَى نَجْمُـهُ *** إِنْ خَاطَبـَـــتْ بـَـــدْرًا مُنِيرًا أَذْعَـنـَــا

مَحْبُوبَتِي قَدْ شَـــــــارَكَتْنِي سِــرَّهَا *** بَلْ عَـــــانَقَتْ حُبــــًّـا تَعـَــــاظَمَ بَيْنَنَا

فِي لَيْلَــةٍ كَحْلا هَمَسـْــتُ لِرِفْقًتِـــي *** بِأَن ِ ارْقُصِي يَا بَـــــدْرَ لَيْلٍ قَدْ سَنـَـــا

خَاطَبْتُهَا مِنْ دُونِ حَـرْفٍ مُطْلـَـــقٍ *** مَحْبُوبَتِي صَــــوْتٌ وَلَحْـــنٌ دَنْــــدَنَـا

وَعَيِيِتُ فِي وَصْفِ المَحَاسِنِ عَلَّنِي *** أُوفِيــــكِ يَا مَعْشُوقَتِي بَعْضَ الثَّنـَـــــا

فِي عَيْنِكِ الزَّرْقـَــــــاءُ قُلْتُ قَوَافِيـاً *** هِـيَ عَيْـنُ بَحـْـــرٍ بِالمِـــدَادِ تُمِـدُّنـَـــا

إِنْ لَامَسَتْ مِنِّي الأَنـَـــامِلَ سَلَّمَـتْ *** وَتَمَـــازَجَتْ طُـولَ المَدَى أَرْوَاحُنـَـــا

مَمْشُوقَــةٌ مَحْمُودَةٌ فِي طُـــــــولِهَا *** وَصَحِبْتُهـَــا مُنْذُ الصِّبـَـــا فِي حَيِّنـَـــا

شَـفـَّتْ، تَكـَــادُ تَرَى مِدَادَ عُرُوقِها *** يَنْسـَــــابُ قَطْـرًا بَعْدَ قَطْـرٍ قـُــنِّـنـَّــــا

لاتَفـْـــزَعَنْ، مَا ذَاكَ شِعْرٌ فَاضِــحٌ *** مـــَـاذاك قَوْلٌ إِنْ سَمِعْنـَـا سـَــــــرَّنَـا

(بنـِّينَـة ٌ زَرقـَــاءُ ) تــِـــلْـكَ حَبِيبَتـِــي *** هِيَ رِفْقَتِي هِيَ صُحْبَتِي كُلُّ المُنـَــى

خَاطَبْتُهَا طُولَ اللَّيـَــــــــــالِي إِنَّهَا *** لِلسِّـــــرِّ حِفـْــظٌ مِثـْـلَ قَلْــبٍ أُمِّـــنـَـــا


--------------------------------------------




لمن لم يفهم بعض الكلمات:



العوالم: جمع مفرده: عالَم

الدنى: جمع مفرده: دنيا

قدها : القد، القـــامة

أذعنا: استمع بإنصات و استجاب بذل

سنا : أي أضاء

عييت : أي تعبت

الثنا : الثناء هو الشكر على الصنيع

المداد: الحبر المستخدم في الكتابة

شـفـَّـت: من الشفافية، أي أنها قلم حبر شفاف، يمكنك رؤية الحبر من خلاله

قنّــنا: من التقنين: وهو التحكم الجيد بالشيء

البنينة: (طبعا هذا تجاوز في اللغة) هي قلم الحبر الجاف (بيرو بالغرباوي يعني)

----------

والآن بعد أن فهمت، يمكنك إعادة قراءة القصيدة على الفهم الجديد

مش عارف ليش الناس دايما فهمها غلط


واحد قاعد يتغزل في البيرو بتاعه، شن المشكلة

ماشاء الله عليك خويا سراب بصراحة ولا احلى



انت عارف رأيى فى اشعارك لكن هذا مميز واجد عن غيرة


ربى يعطيك الصحة و إن شاء الله ديما تشتغل قريحتك بيش نقرو من اشعارك



موفق يارب

خويا وحبيبي د.ميدو

والله امصدقك

احم احم،

أخجلت تواضعي


وبالنسبة للبحر

فهذا بحر الرجز

وتسلم لمرورك الكريم

-----------

امنور يا True blue

وصدقني طالما فيه قهاير، فالقريحة شغّــالة وعال العال

----------

اوهوووو حبيبي sniper

شكراً لكلماتك الطيبة

وفكنا من تعويج الدوّه، هذا هوا اللي كنت خايف منه


ياهوه والله بنينة مش حاجة ثانية ، ما تعوجلناش الدوّة يا عمو سنايبر


(عارفـــني أنت)

---------


يا الغالي عليا spider

امنور يا مان

واضح جداً

وإن شاء الله ديما الضحكة

--------

أختنا harmony

مرورك هو الأجمل

ومرحبتين بيك في عائلة منتدى تصميمي



شرّفني حضورك كثيراً

-------

يامرحب يا مرحب بـ Immortal

Immortal كتب:

روعة روعة روعة روعة .....يسلم هالتم

من وين جاتك اللهجة هذي؟؟

حاولت انركبها عليك ما صار شي

عموما امنور الموضوع بردودك الرقيقة

------------------------------------



انجوا للجماعة اللي قروا القصيدة من غير ما يعلقوا، ولا يضيفوا رد



(معقولة ما ضفتش رد وجاي تقرا في ردودي على الجماعة)



عليش القصقصة الزايدة؟





عندي معاكم حساب



مازلت أنتظر ردودكم ، وإلا يصير فيها





انبصر معاكم




مروركـ شرفني وإن لم تضف تعليقاً

بصراحة شعر جميل و استخدامك و التزامك ببحر معين يدل على مدى ضلاعة شعرك و طلاقة لسانك .
يعني بصراحة اول مرة شعر يستفزني نقراه مرارا و تكرارا.

و استخدامك لبحر الرجز خطر علي أيام و ذكريات استاذ نوري بتاع العربي. نفخهن لنا بتهدريزه علي بحور الشعر العربي و كان ديمه يهدرز على بحر الرجز .عليك أيام!!!

بس خطرها ( هو شن خطر عليك انك تغزل في البيرو ؟؟؟؟)
انا عن نفسي علاقتي بالبيرو رايحة سطحية خاصتا بعد دخولي للجامعة قعدت معاملتي معاه معاملة كعك , كعك بالبنبنة على الام سي كيو و (A,B,C,D). و بس خلاص .




يعني ما نستحقلش إلا في أوقات الزر . و بعدها اشلط

Immortal

قطعتونا بــ باب العمارة



قصدي باب الحارة



-------------





Dark Angel

معقولة علاقتك مع البيرو سطحية!!!


امممممممممم


طيب أنا حنديرلك حل


أنت بس فكر كالتالي:


فكر في أن البيرو هيا نفسها البيرو اللي يرصدلك بيها الدكتور في درجاتك

ويكتب في درجتك في الكشف

أنا متأكد أن أنت بالذات لو فكرت هكي


حتحترم البيرو جداً جداً جداً


وحتكتب في مدح و غزل البيرو دواوين



وحتقيم معاها علاقة ود واحترام متبادل



ما تفهمنيش غلط

وخليك سبورت يا برو


-----------

وبارك الله فيك لأنك خطرت علينا مخاطير أستاذ نوري

الله يسامحه

شكراً لمرورك الذي عطّر الصفحة

وشرّفني كثيراً أن الشعر أعجبكـ
----------

تعرف يا sarabsal

أول ما شفت العنوان قلت كنه سراب شنو صارله

بس قلت ما علينا خلينا انشوفوا شنو كاتب


...

خشيت علي الصفحه

لقيت المقدمه يالي كاتبها قلت

(يستر الله)


...

بعدها بديت نقرا في الابيات

انصدمت



قلت كنه سراب

وبيني وبين نفسي قلت شكله (فاهم الأشراف غلط )

يعني كان قعد مشرف معناها ينزل يالي يبيه



يعني

(ستر الله باقي)


وقعدت نقرا في الابيات وبعد كل بيت يزيد ينفتح فمي شويا شويا



لعند ماوصلت للنهايه

ولقيتها بنينة


..

..

..

..

..

..

..

..
بنينة يا راجل ..... بنينة



أمكبد علي بنينة



ممشوقة ما ممشوقة



كيف أنت حاطها قدامك وتشعر ولا هي نفس البنينة يالي كتبت بيها ولا شنو ؟



بس بنينة



هذا كله علي بنينة مازلت مش مستوعب الفكره انا



باهي كويس يالي جاتك علي بنينة

المره الجاية شنو تبي تأخذ من الدزان عشان تشعر علية

راهي تطلع براية


..

..

..

..

..


المهم

..

..

شفطت واااجد حسيت روحي

صاااح !!!

قول شفطت هلبه صاااح !!


...


خليني نحكي جد توا



احم احم

::

بغض النظر عن لو كان الشعر علي بنينة ولا غيره

انقولك

إني من أشد و أكثر المعجبين بقصائدك



و أنت تكتب بحبر مميز

-( بحبر سراب)-

حبر نادر جداً

بكلمات راقية زاهية بعطر فواح منثور

كلمات تقف لها جميع معاني الاعجاب والتقدير

تعجز لها الاقلام فلا تستطيع ان تجاريها

كلمات حلوه ومعبره

وانت عارف رأيي في قصائدك من قبل

وعارف شنو القصائد يالي يعجبني

مهما دويت كلامي مش حيزيد شي يعني...لان هذي موهبة فيك

مش تفكر انت ولا غيرك

إني نكتب وخلاص

(وننفخ فيك) زي ما يقولوا

بالعكس والله

حاولت ننقدك بس مالقيتش مخش بكل



والقصيدة جميلة جداً

أستمر هكي

وموفق أن شاء الله

..

..

خطرها

انت كاتب

اقتباس :

وصدقني طالما فيه قهاير، فالقريحة شغّــالة وعال العال

أيييييييييييييييييه خطرها علي القهاير يعني

يسلموا عليك عيت زمرينة

وبركان نشد عليك اليوم




..
..
..



عموماً

إن شاء الله مانقعدش طولت عليك بس

وخذيت من وقتك وانت تقرا في كلامي الفاضي




ومهما كتبت مش حنوفي يعني

::

تقبل مروري المتواضع


يا... دئوشي





تحيـــــــــــــــــــــــاتي

الحمد لله اللي طلعت بنينه

عارف ليش؟؟؟

نسحبها قطوسة

لكن ما شاء الله عليك صراحة
عرفت توصفها

حتى أنا توا اندير شعر على قلمي
في ايش احسن منه بنينتك

سلمت يداك
وموفق

صحيت أول مرة تمر عليا بصراحة

لكن جميلة جدا ومميزة

ابدعت بالكلمات

ابدعنا بالمزيد


ســــــــــــــــــلام

أخي العزيز N007

جميل أنك حكيتلنا قصتك وكيف دخلت موضوعي

من البدايــــــــــــــــــــــة


لكن تمنيت أنك تبدا القصة من البداية بكل يعني من أول ما درت ((دخول))



يا جماعة راهو يديرها جديات بس !!





انبصر معاك يا برو

صار فاهم الإشراف غلط صار!!

تعبير مقتبس !!

بعدين خيرها البنينة ما يتكبدش عليها؟؟



عموماً رغم تشفيطــك الدائم

في نهاية ردك لمّيـــت الموضوع

----

لكن خطّرها

شن دخّــل الزمارين في القهاير

وشن علاقة البراكين بالموضوع



بعدين تعال هنا

هذا كله مرور متواضع


كيف يصير يا ؟؟

عموماً يا غالي عليا كويس بكل بكل بكل أن القصيدة نالت إعجابك

وبارك الله فيك
-----------------------

A.S.A



حتى أنت تشفط؟؟

ماشي يا عمو

بصارتك مقبولة منك هالمرة

لأنك ما تعرفش سراب بس

حتى أسأل الجماعة


هالمرة سلمت مني

المرة الجاية

تؤ تؤ تؤ


ما نضمنلكش روحي

----------------

مرحبتين بيك يا سنايبر مرة ثانية

وعارفني أنت يا برو

--------------------------

بنت البحر كتب:

الحمد لله اللي طلعت بنينه

عارف ليش؟؟؟

نسحبها قطوسة

لكن ما شاء الله عليك صراحة
عرفت توصفها

حتى أنا توا اندير شعر على قلمي
في ايش احسن منه بنينتك

سلمت يداك
وموفق

مرحبتين بأختي بنت البحــر

شرفني مرورك الغير متوقــع

وين كنتي غايبة أختنا؟

إن شاء الله المانع خير

حتى أنت تشفطي؟؟


بعدين شن قصة القطاطيس اللي كاثرات في المنتدى؟؟


طول الليل مياو مياو

،،،،،

وننتظر شعرك عن قلمـــك

بس أتمنى يكون مبرّى لأن ما عندناش برّايــة

(بيني وبينك كلنا نستخدموا في قلم السنون، حتى أسألي نوح)

،،،

وشرّفني أن القصيدة أعجبتك

-----------------------------
حبيبي lost memo

والله إلك وحشة ما تتصورها


(أهي الناس اللي تردّ دغري)

وبعيداً عن ظاهرة التشفيط المتداولة مؤخراً بين أعضاء المنتدى والتي قد تؤدي إلى تداخل وتزاحم وأيضا قد يتنامى عند بعضهم شعور ضد ما قد يؤوّل إلى....... احم احم ، حسيت روحي انسجمت

المهم

بارك الله فيك أخي لوست ميمو

وأتمنى أنك ما تكونش لوست

-----------------

مرحبتين بالمصممّة هانلي

والله شن نقولك!

البيرو هذا إشارة لقلم الشاعر ، بغض النظر عن نوعه أو قصته

يعني أن صديقتي قلمي وكراستي

(فكرة والله ، المرة الجاية حندير على الكراسة)

مرورك شجّــعني كثيراً

-------------


أختنا PuRe

وين هالغيبة

بعدين شن قصدك أول مرة تمر عليك؟؟

قصدك أن اللي من قبل مار عليك؟؟



صدقيني كله من عمايل بنينتنا


وننتظر إبداعك أنت كمان

بعد غيابك الطويل عن الساحة


----------------------------------------------

وللجميع تحايا سراب الدائمة والنقية

بوركتم من إخــــوة على حب الله اجتمعتم


وعلى قولة القايل

دع الإبــــداع يتجــــدد

بعد السلام

اقتباس :

مرحبتين بأختي بنت البحــر
شرفني مرورك الغير متوقــع

اسمحلي خيو بس خفت ايمر استاذ نوري ولا أبلة فتحية
ويشوفو الخطأ هذا

الله يهديك
مش ديما انقولو الحروف لا تُعرف

يعني لو تبي تقدر تقول
(غير المتوقع)

أكيد عارفها غير أطيّر فالعين

اقتباس :

بعدين شن قصة القطاطيس اللي كاثرات في المنتدى؟؟


طول الليل مياو مياو

شن قصة القطاطيس اسم الله الكريم؟

اكيد القطاطيس هذينا في حوشكم لأن نحنا
زي ما انت عارف نسكنو في عمارة يعني فوق مايوصلنش صوتهن
مش زيكم تسكنو تحت
وتسمعو فيهن


مع تحياتي
أختك
***

تعرفي

والله فرحتيني واجد أن في وحدين في المنتدى مهتمين باللغة

ويراجعولي في ردودي مراجعة لغوية




بارك الله فيك وكلامك مضبوط

ودخول (أل ) التعريف على كلمة (غير) خطأ شائع

يعني الحمد لله مش أنا اللي سنيت هالسنة

------------

أما بالنسبة لموضوع القطاطيس

بنت البحر كتب:

الحمد لله اللي طلعت بنينه

عارف ليش؟؟؟

نسحبها قطوسة

أنت اللي جبتي سيرتهن


--------

بنت البحر كتب:

اكيد القطاطيس هذينا في حوشكم لأن نحنا
زي ما انت عارف نسكنو في عمارة يعني فوق مايوصلنش صوتهن
مش زيكم تسكنو تحت

ايه عارف أنكم متشنقلين فوق

وكذلك ما عندهن كيف يجنكم القطاطيس

خصوصاً أن حتى بلكونيكم عليه شبردق

سوري

قصدي عليه حديد





وعلى فكرة عاودي راجعي ردك حتلاقي أخطاء إملائية بالهبل

مابيتش اندير كيفك ونراجعلك ردك

لأن مش تخصصي




هيا السلام عليكم



أخـــوك سراب

مراحب يا مديرنا


إيه أكيد

كل شيء ســـراب

ليش ما يكونش في الشعر ضرب من ضروب السراب كذلك



مرورك شرفني كثيراً يا مدير

وكلماتك وتشجيعك شهادة أعتز بها

مرحباً بكـ تحت الأضواء مرةً أخرى

(بعد أن التزمتم الكواليس برهة من الزمن)

امنور يا مديـــر

**************

مراحب Ice

حمداً لله على السلامة أولاً

ما فاتك إلا كل سو إن شاء الله

وبصراحة بصراحة

ردك أخجلني كثيراً

(مش لدرجة أعمدة من أعمدة الأدب العربي)

راهو نصدق روحي ونشوف حالي عليكم

(والعياذ بالله)



بارك الله فيك يا آيس

على ردك المتألق هذا

(عجزت عن الرد بما يليق بردك)